Blogia
O blog d'a trobada

trobada

"O LAMIN"

Chorche y Anica yeran dos chirmans que bibiban en un lugarón. Os dos chirmans yeran prou laminers y lis cuacaba muitismo toda mena de dulzes, aunque en casa no lis ne daban dengún.

Un diya, su mai lis nimbió ta la botiga ta mercar 2 kg. de sosa caustica ta fer xabón. En tornando ta casa prexinaban con as suyas berucas y, dimpués d'un ratet, Chorche li'n dizó t'Anica:

-          "Estoi que isto que emos mercau son como lamins. Mira-te-los que polidos que'n son. Imos a probar-los!"

Cuan Chorche y Anica en proborón un, creyoron que a suya boca s'eba tornau fuego y se'n fueron ta casa ta que a suya mai metese remeyo.

 

Chusé Miguel Muñoz Marta

 

¿Y esta publicidad? Puedes eliminarla si quieres

"CURRA"

Teneba una mirada bien escoscada, os suyos güellos berdes deziban sin dezir, no sabeba d´emboliques ni d´embrollas, natural de contino, fiel como ra mesma güembra, anque teneba intes en los que te poderba esgarrapar a cara si berruntaba que no bi eba reziprozidá.

Una nuei, sin más ni mangas - ella se´n sabrá por qué - s´abentó de casa. Un día, dos, tres e cuatro sin saber cosa. O zinqueno m´amanexió ploriconiando con una pateta de debán tallata. Me miró como una persona en tanto la curaba. Pa cutio la clamé Curra.

Chusé Antón

 

"O DESEYO D'ESTAR GOYOSO"

Tot yera parato.Ro carbonero marchaba a ras gueito coladas dende Benás enta Zaragoza. Biachaba Bizén, un mozet zereño escando una bida millor. Dixaba dezaga, ploramiquiando, a ros suyos. En ro morral, eban mesos muita ilusion,suenios e premisas.

Pasoron os diyas e conoxió ra reyalidá : chornatas prou largas en ra fabrica, prez caros e ro pior: chen garra solidaria. S'en rediban ros compañers cuan lo ascuitaron:< Bi torno>. Ers li'n deziban:< piensa-lo-te bien que astí s'en fan muitas de perras>. E remató:< A yo ros diners, rai. M'agoyan más ras guellas con ra libertá mías en Benás>.

Daniel de Teruel

"La bida bueda"

Yera un diya griso en un instituto cualsiquier. O reloch mobeba as manetas d’una parti t’atra mientras a galbana d’a mayor parti d’os escolanos empliba la clase. Un bombolón dentra por a finestra y lo mayestro, meso de raso en a suya esplanicazión d’a relatibidá, beye de bislai cómo o chicorrón inseuto creya más intrés que él en unas capezas an que no i culle que a “botellada” d’an que bienen y ta la que ban. Contina con Einstein. Con suerte, belún li ascuitará y trobará bel inte ta estudiar, ixo sí, dentre borina y borina. O reloch contina chirando.

Alexandro Muñoz Casas

"O MOSQUÍN"

Ya feba un ratet que  s’esbulligaba inquieto en o suyo posiento. Cualcosa que li s’eba estrangullau en o garganchón luitaba por surtir y os suyos esfuerzos por aturar-la resultaban cada begada más inútils. A cara li s’eba meso roya como un ababol y os güellos, ofegaus en sangre, desimulaban mal dos larimetas furtibas que as mans no enzertaban á ixugar. Alentaba con dificultá y a suya cara amostraba un zeño ridiculo que quereba semblar una riseta. Sentiba que todas as güelladas li se clababan en o corazón que, á ixas alturas, li traquetiaba esbocau.

   De sopetón, a suya boz sonó como un truen en a sala plena á rebutir de compromisarios: ARAGÓN YE NAZIÓN!!!

  Ixas estión as suyas zaguers parolas como presidén d’o Partiu Popular.

FELI

 

¿Y esta publicidad? Puedes eliminarla si quieres

"L'EURIBOR"

-¡Estamos abiaus, chiqueta! ¿Paras cuenta d’o que diz o matutan ixe n’a tele? ¡En menudo berenjenal nos imos plantau!

A muller, ni caso. Por o tozuelo l’en iba solo que a casa nueba, con a de diners que’n eba costau d’ampar. ¿Y si se’n iban a fer pocha ta Dubai? ¿Dexar os fillos en Uesca, con os güelos?

Os zagals dale que te pego con meter os Simpsons y l’ombre enfuriziau con as notizias.

-¡Quiers izir algo u qué, muller, qué parizes un pantasmón con os morros pretos!

En estas que a cría grán...espeta: -¿Mamá...qué ye ixo de l’euribor?

Sagardiana

"Dispierta Fierro!"

 ¡Levántate! Quien te dijo que debías descansar se equivocó.

¡Adelante! Quien te hizo pensar que debías desistir, te manipuló.

¡Vamos! Quien te puso trabas, te limitó, te obstaculizó...simplemente te estaba subestimando.

Quien te dijo que nada serviría y esperó que te rindieras, quien sólo hablaba de fracaso y deseó desalentarte, quien se resignó, procuró que le imitaras e intentó que agotaras tu ilusión...¡no conocía la fortaleza de tu espíritu!

El mundo te está esperando, nunca te des por vencido

¡Dispierta fierro!

Cati Borobia Escobar

“Falordia d´un gallego en Aragón”

Cuan biyé por primera begata ista tierra, me enamore d´os Pirineos, y d´a calidá de bida que se esfruita. Pasorón as añadas y he ito escubriendo as marabiellas que me ofrexen os diferens puestos, asinas como a suya chen ,y sus güenismas chentas.

O que mas m´encarraña, ye que a luenga dista tierra ye despreziata, ya que ye una luenga muy polida parellana a o gallego, que ye patrimonio cultural d´os aragoneses asinas como o gallego lo ye ta yo, y aspero que l´aragones no s´amorte, que os fablans no reblen en ista luita, por beyer-lo ande perén deberba estar ,entalto.

Verónica Escartín Sanchez

¿Y esta publicidad? Puedes eliminarla si quieres